2025

Рифат СӘЛАХ

СИНЕҢ ӨЧЕН

Мең Мәҗнүннең сөюе дә җитмәс,
Синең өчен дигән җырларыма.
Мин әзермен синең җанга күчеп,
Йөрәгеңдә эреп югалырга.

Мин әзермен сиңа гына җыеп,
Бу дөньяның бөтен чәчәкләрен,
Һәм үтәргә мәңгелекнең чиген
Алып синең бөтен хәсрәтләрең.

Синең йөрәгеңнең серләренә
Төшенергә ничек мөмкин икән?
Мәхәббәт ул үзенә бер яшәү,
Син булмасаң миңа үлем икән.

Син сулышым минем,
Син — язмышым,
Аллаһ Үзе биргән бүләк миңа.
Көтмәгәндә-уйламаган чакта
Ул чыгарган сине юлларыма.

Ә мин синсез шундый китек идем,
Син булганга дөньям түгәрәктер.
Син болында уйнап йөргән кызчык,
Мин сөкәгә эләккән күбәләктер.

Мәхәббәтең ятьмәсенә эләктем,
Ул ятьмәдән килми чыгасым да.
Синнән башка килми минем җирдә
Гел бәхетле генә буласым да.

Синең өчен диеп яшим җирдә,
Синең өчен диеп китәрмен дә.
Мин үземне ягып яна алам,
Йолдыз гына булсын күкләреңдә!

21.01.2025