2011

Рифат СӘЛАХ

Сирень чәчәкләре

Сирень чәчәкләре бүләк иттең...
Зәңгәр төскә чумган гөлләрең.
Минем өчен иң кадерле бүләк –
Яктылыкка чумды көннәрем.

Күзләреңдә балкый шаян нурлар,
Мин аларда эрим. Эреттең!
Бер карасаң, сәер тоеладыр
Чәчәк иснәүләре егетнең.

Ә син гашыйк... Синең күзләреңә
Туры карый алмыйм: пешерә.
Шул да җитә миңа, карашыңнан
Сөю өмет иткән кешегә.

Учларымда күкләр тотып торам,
Зәңгәр күктәй балкый гөлләрең.
Сирень чәчәкләре кушып үргән
Мәхәббәтең – иң зур бүләгең!

2011