РИФАТ СӘЛАХ

2005

Рифат СӘЛАХ

​

Беләсеңме?

...гә

Беләсеңме?

Сине күрү көнен

Мизгел санап көтеп алганны,

Очрашуга юллар эзли-эзли

Йөгерә-йөгерә сиңа барганны.

Беләсеңме?

Әгәр син күренсәң

Йөрәгемдә учак кабына.

Мин сискәнеп китәм синең сүздән –

Борыч сипкән төсле каныма.

Беләсеңме?

Күзләреңә керсәм

Күзем ала алмый торамын.

Син бит мине ташкын хискә күмгән

Иң беренче сылуы дөньяның.

Беләсеңме?

Ярларына тулып,

Күңлем ташыганын сөюдән.

Мин бәхетле – сиңа гашыйк булып,

Сине яратуга сөенәм!

25.04.2005