РИФАТ СӘЛАХ

Рифат СӘЛАХ

​

Әллә шуңа

 

Күзләреңә дала җиле сеңгән,

Алма исе сеңгән киемеңә.

Бигрәк тыйнак үзең,

Артык тыйнак,

Әллә шуңа кердең күңелемә.

 

Күзләреңә төннәр сере иңгән,

Алма алсулыгы битләреңдә.

Бигрәк нурлы үзең,

Бигрәк җылы,

Әллә шуңа кердең йөрәгемә.

 

Күзләреңдә ниләр чагылса да,

Өләшәсең җанга нурлар гына.

Бигрәк моңлы үзең,

Бигрәк серле

Әллә шуңа күчтең җырларыма.

13.01.2020