РИФАТ СӘЛАХ

Рифат СӘЛАХ

​

Син киләсең

 

Һәр адымың саен

Йомшак җилләр

Битләремнән килеп иркәли.

Син килмәсәң, бәлки тумас иде

Мондый җылы, нурлы иртә ди.

 

Һәр адымың шундый иркә синең,

Җиргә тими очып барасың.

Син килмәсәң, кичә алмас идем

Сагыш белән сагыш арасын.

 

Иңнәреңдә гүя кош канаты,

Юлларыңда үсә гөл генә.

Син килмәсәң, бәлки тумас иде

Җилкендергеч хисләр күңелдә.

 

Һәр адымың сине якынайта,

Җыр өләшә йомшак җилләргә.

Син килмәсәң, сүнәр иде иртә,

Чәчәк атмас иде гөлләр дә.

 

Җилләр ерып, син киләсең миңа...

Нур өләшеп гүзәл дөньяма.

Син килгәнгә генә кояш яна,

Җырларыма якты моң тама.

13.01.2021